Training Caravan / Ikertzaileak gelara. Horixe da Ikerbasque, BC3 eta Hezkuntza Sailak elkarlanean aurten bigarrengoz martxan jarri duten ekimena. Topaketa hauen xedea da nazioarteko goi-mailako ikertzaileak Batxilergoko ikasleen geletara hurbiltzea. Ikertzaileek bertatik bertara kontatuko dizkiete ikasleei beren bizipenak, ikasleek ikerkuntzaren alderik erakargarriena ezagut dezaten eta, bide batez, zientzialariei buruz egon daitezkeen estereotipoei aurre egin diezaieten. Iaz, mila ikasle inguruk parte hatu zuten topaketetan, eta, aurten, guztira 30 hitzaldi antolatuko dituzte beste hainbeste ikastetxetan. Ikerbasqueko 18 ikertzailek eta BC3ko beste 12k parte hartuko dute ekimenean. Fisikan, informatikan, elektrokimikan eta ekonomian adituak dira, besteak beste. Gu Koen Vandenbroeck ikertzailearen hitzaldian izan gara, Indautxuko Jesuiten ikastetxean. Ikertzaile belgikarra Biologia Molekularrean doktorea da.
AINHOA MADARIAGA; Ikerbasque Fundazioa: Badugu susmoa, gaur egun, Euskal Herriko ikasleek ez dutela interes handirik ikerkuntza-karreran. Susmoa baino gehiago, unibertsitatean jaitsiera nabarmena egon da ikerkuntzarekin zerikusia duten karreretan. Orduan, pentsatu genuen "zergatik ez hurbildu ikerkuntzaren mundu hori ikasleei?"
ANE UGARTE; Batxilergoko ikaslea: Nik ez dakit medikuntza edo biokimika ikasiko dudan. Bi horien artean nago, eta horrelako gauzek asko laguntzen dute.
KOEN VANDENBROECK; EHU/Ikerbasque ikertzailea: 16 edo 17 urteko ikasleek zientzia ikasi nahi badute ¬–biologia, genetika, biokimika…¬–, aurrera begiratu behar dute. Hau da, ikasketak amaitutakoan zer egin nahi duten pentsatu behar dute. Helburuak ez luke izan behar ikasketak amaitu eta titulua lortzea. Izan ere, gero egingo dutenaren arabera ¬–doktore-tesia idatzi, enpresa bioteknologiko batean lan egin…¬–, aukera jakin batzuk egin behar dituzte.
ANE UGARTE; Batxilergoko ikaslea: Ikertzaile izateko behar dituzun ezaugarriak aipatu ditu: pazientzia handia izan behar duzula, gauzak lortzeko behin eta berriz saiatu behar duzula… Horiek entzundakoan, esan dezakezu ‘bai, ni horrelakoa naiz’, edo ‘ez, ni ez naiz horrelakoa’, eta, hala, lan hori zuretzat egokia den ala ez jakin dezakezu.
KOEN VANDENBROECK; EHU/Ikerbasque ikertzailea: Zientzia ikasten baduzu, interesa izan behar duzu, naturari buruzko galderak egin behar dizkiozu zure buruari, pertsona irekia izan behar duzu, imajinazioa izan behar duzu… Batzuetan, agian denbora asko pasatuko da ikerketak emaitza interesgarriak eman arte; beraz, pazientzia izan behar duzu. Ezin duzu amore eman eta ezin duzu aurreiritzirik eduki.
ANE UGARTE; Batxilergoko ikaslea: Niri interesgarria iruditzen zaidana da asko hitz egiten dutela dibertsifikazioari buruz. Atzerrian lan egitea eta pertsona desberdinekin egotea, nire ustez, aberasgarria eta interesgarria da. Hori oso erakargarria da ikerkuntzan lan egiteko.
KOEN VANDENBROECK; EHU/Ikerbasque ikertzailea: Gaur egun, oso aukera interesgarriak daude doktore-tesia atzerrian egiteko, bai Europako beste herrialde batean, bai Amerikako Estatu Batuetan. Aukera horiek hor daude, are gehiago ikasle onenentzat. Baina horrek ez du esan nahi nik hori bakarrik gomendatzen dudanik. Doktore-tesia Euskal Herrian egiteko aukera ezin hobeak ere badaude. Hemen oso laborategi onak daude, eta primerako trebakuntza eman dezakete doktore-tesia egiten ari diren ikasleak goi-mailako zientzialari izateko.
AINHOA MADARIAGA; Ikerbasque Fundazioa: Guk ikastetxeei aukera ematen diegu hitzaldiaren espezialitate-mota aukeratzeko. Egia esan, gehienek zientzia esperimentalak edo medikuntza aukeratzen dute. Hitzaldiak ingelesez izaten dira, 45 minutukoak, eta gero ikasleek galderak egiteko aukera dute.
KOEN VANDENBROECK; EHU/Ikerbasque ikertzailea: Esan beharra daukat oso gustura egon naizela audientzia honekin. Ikasleek esaten nuenari erantzuten ziotela ikusi dut. Eta oraindik gehiago gustatu zait nire hitzaldiaren ondoren jaso dudan erantzuna. Ikasleak benetan interesaturik zeuden, eta oso galdera onak egin dizkidate. Horietako batzuek erronkak planteatu dizkidate! Oro har, oso inpresionaturik nago ikasle-talde honekin.
Buletina
