Eskiatzeko aplikazioak
2012/03/11
Iturria: Teknopolis
Eskiatzera zoazenean smartphonea oso baliagarria izan daiteke, aldez aurretik aplikazio egokiak deskargatuz gero.
Transkripzioa ikusi
Hemen, 2.000 metroko altitudean, telefono mugikorra oso baliagarria izan daiteke, segurtasun-kontuengatik, edo lagunak erraz topatzeko, besterik ez bada. Baina sakelan daukazuna smartphone bat baldin bada, oraindik baliagarriagoa izango duzu, aldez aurretik aplikazio egokiak deskargatuz gero.
Interneteko konexioaz baliatuz, eguraldiaren iragarpena, elurraren egoera eta irekita dauden eski-pistak kontsultatu ditzakezu. Badaude hainbat aplikazio informazio eguneratua modu intuitiboan jasotzeko: Estaciones de Esquí izenekoak, adibidez, Espainia osoko estazioak biltzen ditu, webcam-etako irudi eta guzti. Ski Report-ek, berriz, mundu osoko estazio garrantzitsuenak. Biak doakoak dira, eta oso baliagarriak eski-bidaiak prestatzerakoan.
Behin elurretan zaudela, batetik bestera joaten laguntzeko erabil daiteke smartphonea. iTraiMap aplikazioarekin, edozein estaziotako mapa deskargatu dezakezu, eta nahi duzunean kontsultatu, baita off line zaudenean ere. Eta euro batzuk ordaintzeko prest baldin bazaude, mugikorra GPS nabigatzaile gisa erabiltzeko aukera duzu. GPS Ski Maps aplikazioak maparen gainean kokatzen zaitu, nahi duzun pista, teleaulkia edo kafetegia arazorik gabe topa dezazun. Satski delakoak, berriz, autoko nabigatzaile baten modura funtzionatzen du.
Gaur egun, eski-estazio askok beren aplikazioak garatu diztuzte, eta, esandakoaz gainera, informazio osagarri asko eskaintzen dute. Beraz, joan baino lehen, begiratu ea zu zoazena horietako bat den.
Eskiatzaile profesionalak ez garenontzat ere interesgarria izan daiteke gure jardueraren nolabaiteko kontrola eramatea, jakin-min hutsagatik bada ere. iSkiTracker, Alpine Replay eta horrelako aplikazioen bidez, elurretan pasatu dugun denbora, egindako kilometroak, batez besteko abiadura eta antzeko datuak ematen dituzte. Hala, salda beroa hartzen duzun bitartean, zenbat hobetu duzun ikusteko aukera izango duzu.
Bideo gehiago
Buletina
