Arrantza komertzialaren eragina
Arrantza komertzialak uste baino eragin sakonagoa du. Irlandako mendebaldeko kostaldean egin den ikerketa batek dioenez, 2.500 metroko sakoneran bizi diren arrain-populazioak murriztu egin dira alturako arrantza inguru hartara iritsi zenetik. Arrantza-aparailu komertzialak 1.600 metroko sakonerara baino ez dira iristen. Hortaz, Europar Batasunak diruz lagundutako ikerketa horrek ondorioztatu du arrantzak baduela eragina orain arte salbu uste ziren hainbat arrain-espezietan.
Energia Eolikoaren Europako Batzarra
Aste honetan, Energia Eolikoaren Europako Batzarra egiten ari dira Marseillan.
Energia berriztagarrien Europako direktiba joan den abenduan onartu zenetik, haren inguruko lehen eztabaida garrantzitsua da. Europako Energia Eolikoaren Elkarteak antolatu du, eta finantza-krisia hasi zenetik industria horrek egiten duen lehen eztabaida da.
Lurra zuzenean Internet bidez
Lurra zuzenean Internet bidez ikusteko aukera ematen du NASAren zerbitzu berri batek. Nazioarteko Espazio Estazioan kokatutako kamera bati esker, planeta edonork ikus dezake bere ordenagailutik, 350 kilometroko altitudean egongo balitz bezala. Seinalea arratsaldeko zortzietatik goizeko zortzietara emititzen da, eta astronauten eta Houstongo kontrolatzaileen arteko elkarrizketak ere entzun daitezke.
Auto ekologikoagoak
Auto ekologikoak izan dira aurtengo Genevako Automobil Erakusketako izarrak. Azokako ‘pabilioi berdean’, petrolioaren ordezko erregaien joera berriak aurkeztu dituzte autogileek: orduko 200 kilometroko abiadura eta 400 kilometroko autonomia izan dezaketen ibilgailu elektrikoak eta 150 zaldi-potentziako motorrak, gasez hornituak.